特首煲呔接受「小特首」訪問，片段噚日出街，內容竟然唔係官腔行貨，煲呔話立志從政嘅人，應該要潔身自愛，身為公眾人物、社會領袖，要以身作則，一言一行都要深思熟慮，佢話呢個係佢從政三大座右銘之一。
煲呔之前話要寬恕政客「感情缺失」，外界以為佢撐唐唐，原來佢對「課外活動」咁有意見，今次暗插唐唐，唔知對佢自己民望有冇幫助。至於另外兩樣從政原則，其一係要謙卑服務市民、多聽意見，另一係有勇氣承擔責任，即使做咗一啲決定俾人批評，但只要對社會長遠有好處，都唔應該怕俾人鬧。聽佢咁講，新居屋、置安心、限量限呎地呢啲政策，應該無彎轉，港府堅持一錯到底了。