咪神媽咪徐淑敏（Suki）一個月前生咗第二胎精靈B女黃心柔（Renee），近日收身後隨即獲無綫安排復出，佢同糖妹Kandy及曾喺《美女廚房》扮美味天使腸粉嘅丁樂鍶一齊主持飲食節目《甜姐兒》，節目喺下月6日首播，主要介紹甜品，監製仲特別安排3索女喺節目唱歌跳舞娛賓，Suki噚日接受電話訪問時話：「我兩位拍檔都係唱得之人，我聽到要唱歌跳舞，好大壓力，好怕趕客，平日我同大女講故事，佢都走開唔肯聽，跳舞郁兩下都唔係好難嘅。」Suki前日仲訪問咗張兆輝。
買衫狂碌卡
Suki日前趁唔使開工，約埋好姊妹沈卓盈去中環鴨巴甸街賣潮服嘅ABoutiqueCentral時裝店揀靚衫，佢哋又揀又試搞咗成粒鐘，最終都滿載而歸，Suki揀咗幾袋靚衫同多對高踭鞋，婚後有老公Kenny提供附屬卡畀佢狂碌，有咁龐大後盾支持自己出鏡賺私己，真係幸福到爆。