小商戶大平賣益街坊，竟然被人施壓加價，香港今時今日就係咁荒謬，大財團惡晒，自己牟取暴利唔在講，仲要拖人落水同流合污，慘得過政府闊佬懶理，廣大市民惟有任由宰割。「關懷香港」四個成員噚日下晝就去咗中環長江中心請願，抗議首富旗下嘅百佳超級市場，壓迫小商戶嘅生存空間。除咗遞交請願信，仲附送一條白毛巾，諷刺大財團榨乾市民血汗錢咁話。
立法會正審議競爭法，關懷香港卻唔睇好呢條法例可以保障公平競爭，睇死唔可以杜絕大財團壟斷嘅局面。佢哋話考慮效法美國佔領華爾街行動，發起一個佔領大財團總部嘅行動，希望多啲市民響應。