黎明早前不斷被周刊指他婚變，又指他自編自導自演把他與太太樂基兒在北京蹺手的相上載微博，昨日他終於首次面對香港傳媒拆彈，怒斥報道荒謬，他說已採取法律行動，並再發表金句：「呢件事唔可以用嬲形容，嬲係一個表情，要用一個行動和態度去面對！」
黎明昨日在海運大厦為第二首3D的MV《情》舉行首播會，心情本來大靚的他，談到早前不斷有周刊報道指他與太太樂基兒婚變就越講越火滾：「已經發咗告票畀周刊，一切唔係事實嘅嘢，交咗畀法庭處理，唔係要唔要澄清，係一次、兩次、三次、四次、五次……連續寫唔係事實嘅嘢，好嚴重，冇可能每日揑造一啲嘢，對藝人唔公平，最好交畀法庭處理，嗰本周刊嘅嘢唔再回應。」
「超越界限」
早前有周刊以反偷拍手法，指黎明自編自導自演把助手在北京拍攝他與樂基兒蹺手逛街的相放上微博扮爆料，提起這篇報道，黎明更扯火：「呢個更加荒謬！」問黎明有沒有此事？他說：「問寫文章嘅當事人，如果每次事實都畀人屈，遲早見到藝人上街示威，為賺錢嘅媒界要清醒啲。我知為咗生活，做一切嘅嘢都有權利。」
黎明嚴肅地說：「偷影我，仲要話我！佢哋（周刊）嘅道德觀念，已經超越藝人同真理可以接受嘅界限。我唔係嬲，呢件事唔可以用嬲形容，亦唔可以用嬲去解決，嬲係個表情，要用一個行動同態度去面對，慢慢等法庭判決。」
談到將在下月舉行的演唱會中連續跳二十幾分鐘勁舞，黎明回復心情說：「以前只係郁吓，家真係跳。」問黎明有否辣身舞？他故弄玄虛說：「唔會用辣身，因為招呼唔到觀眾，其中一部份同觀眾互動，牽涉好貴嘅獎品，幾得意，觀眾會嗌唔停。」
另外，昨日在場歌迷看完3DMV後要求安歌，所以連播了兩次，黎明指這3DMV花了四個多月拍攝和製作。
紅館外賣碟
據知，演唱會期間黎明會推出個人大碟《XDec11》，但今次不會在唱片舖出售，只會在演唱會期間於紅館場外售完即止。
採訪：溫敏之
攝影：陳志嵐