被譽為「公職王」嘅Edgar鄭維健，噚日突然宣佈同時辭任中海油（883）同瑞安房地產（272）嘅獨立非執董職位，原因係健康問題。佢今年都成67歲，家連公職都無法兼顧，梗係要先養好身體，咁公職王都要退休享福啦！
其實鄭維健本身係結腸癌專科醫生，家族新加坡永泰集團本身做製衣生意同地產；但最多人識佢係已故船王包玉剛嘅女婿，雖然同船王四女包陪慧喺98年離婚收場，但繼續負責船王留低嘅環球投資。
鄭維健雖然有生意在手，但好鍾情公職工作，做過唔少崗位㗎！好似聯交所主席、恒生（011）副主席兼非執董、政府中央政策組首席顧問等，家仲係全國政協委員。佢02年曾經做過董建華競選連任嘅辦公室主任，同當時嘅競選辦主席梁振英拍檔。家振英埋緊班，但睇怕Edgar今次真係好難幫到手。