上市啱啱半年嘅米蘭站（1150）前晚出咗張通告，話要改變上市集資用途，用原本攞嚟喺內地開店嘅3750萬蚊，改為喺尖東南洋中心買咗間實用面積約6520平方呎嘅辦公室。華華第一個感覺：乜唔係話大搞內地咩？無啦啦攞一半集資額嚟喺香港買個office？唔通轉咗去炒寫字樓？
對於細樓搬大樓一事，米蘭站嘅官方解釋係因為俾人加租，仲強調「只係重新分配額外嘅集資額，仍有足夠資金喺中國開設合共24間新零售店」。
華華睇返招股書，或者可以幫佢哋諗個另一個理由，原來主席兼大股東姚君達同埋佢細佬妹，分別住喺京士柏山同西九，咁office搬去尖東，返工點都方便過喺九龍灣嘅舊office。
之不過，舊寫字樓大約4386方呎，華華諗唔明點解要搬一個大五成嘅新office呢？又唔見佢會請多咗人喎。