成日話內地公司嘅企業管治差，但其實亦有例外，好似唔少內地企業近年都將董事長同總裁職位分開由兩個人擔任，日前中電信（728）就宣佈，委任執行董事楊杰做公司總裁兼首席營運官（COO），王曉初（王總）就繼續做董事長兼首席執行官（CEO）。
樣貌相似 別無含意
華華對新上任嘅楊總的確印象唔深，噚日專登上網搵吓佢嘅資料，有網站將佢張相同王總張相放埋一齊，華華一望仲以為搞錯，因為唔單止兩人個樣好相似，仲連髮型、眼神都差唔多。
不過華華再望多一陣，發覺楊總同另一位都曾經係內地電訊公司阿總個樣都好鬼似。
邊一位？就係早幾個月被判死刑嘅聯通（762）前阿總張春江是也。唔係講笑，佢哋真係幾似樣㗎，有圖為證。唔通內地電訊公司老總係有樣睇？先旨聲明，華華只係話佢哋三位個樣相似，別無其他含意。
講返楊總，49歲嘅佢曾任山西省郵電管理局副局長，其後加入中電信一直至今，之前主要負責網絡建設。聽聞市場對佢今次突然跑出都有些少意外，皆因佢平日個人好低調，即使開會亦只會就自己熟悉嘅範疇表達意見，其他議題好少發言，絕對係適當時候做適當工夫、悶聲發大財型啦。
李華華
mailto:[email protected]