曼城嘅「腦殘」前鋒巴洛迪利，同EDC一樣都堅鍾意媾女，不過佢就唔like模同拍「閃卡」相，淨係鍾情條事業線，專媾咪神。日前「腦殘」就俾英國《太陽報》影到，背住女友拉費娜，偷嗒坐擁32FF巨乳嘅四仔女星荷莉（HollyHenderson），認真識嘆！
停車場上演「舌」戰
巴洛迪利趁自己嗰位模特兒女友拉費娜日前返意大利做嘢，就即刻曳曳！英國《太陽報》日前大爆，四仔女星荷莉去咗曼市一間酒店影相，腦殘哥突然殺出，等荷莉拍完嘢之後，仲好有風度咁幫對方拎手袋走人。兩人仲喺酒店停車場即興嚟個「車輪戰」！車完之後齊齊煲番支煙，然後一齊上荷莉架跑車走人。
拉費娜見到男友趁自己唔喺身邊就極速偷食，一定會嬲到爆，而我求大俠亦可以肯定，曼城領隊文仙尼見到契仔當眾食煙，必然會火都嚟埋。
自稱單身專吼巨咪女
腦殘哥一位身邊好友同英國《太陽報》爆料，話呢位21歲嘅意大利國腳已經冧咗32歲嘅荷莉好耐。佢仲話：「巴洛迪利之前clubbing識咗荷莉之後，好似飲咗迷湯咁。」不過腦殘哥都食過幾次檸檬，之後先至得米，佢好友繼續話：「佢一路想追人，但係荷莉唔想剩係做足球員嘅性伴侶，所以一直拒絕佢嘅追求。」呢位仁兄仲話，腦殘哥出嚟滾係有原因，事關同拉費娜感情出咗問題：「佢同荷莉講自己單身㗎，不過之後佢自動投案，話家同拉費娜出咗問題喎。」
查實腦殘向來鍾愛巨咪豪放女。佢嚟咗英格蘭唔夠兩年，換咗3次畫，仲要個個心口條事業線都成呎長。我求大俠仲八到，佢偷食有前科，之前同艷照影星蘇菲（SophieReade）一齊嗰時，已經試過偷嗒人地嘅bestfriend。今次如果拉費娜要打要殺，我求大俠一定企喺女方嗰邊！