遠東系嘅創辦人邱德根（圖），早排正式退下火線，將家族上市旗艦遠東發展（035）交棒俾大房嘅邱達昌接棒，之不過，舊年就有單嘢搞到佢老人家唔多高興，事關二房細仔邱達根惹上官非，涉嫌喺07年串同遠東控股（036）兩名下屬違規借款，搞到同父異母嘅大佬邱達昌即日辭咗遠東控股非執董一職，仲要發聲明公告天下。
邱達根、邱達成辭任執董
呢單官司到今時今日都未搞掂，遠東控股前晚就發咗份通告，話邱達根已因「個人理由」辭咗執董唔做，連大房嘅邱達成亦都辭埋執董職務，要由平日非常低調、無咩見人嘅二房大佬邱達偉調番出嚟做執行董事。
單case早排已押後到明年2月先開審，85歲嘅邱德根唔知係咪因為呢單嘢，所以仲未放得低遠東控股，家仲做緊公司主席，今次搵達偉幫手，睇怕都係要個仔暫時幫吓手，主持大局。