近期恒基地產（012）主席李兆基嘅乖孫搞咗個party，細少家誠同老婆子淇開開心心咁帶住屋企個新成員見吓自己啲朋友，即係新乖孫啲uncle同auntie啦，轉個頭無耐，就傳出四叔同老臣子林高演將權力下放，辭任恒地33間附屬公司嘅董事職位，交棒畀細少上位接任嘅消息，令人聯想到係四叔淡出，部署退休噃。
咁大單嘢，華華噚日即刻搵恒地公關大員Bonnie姐問吓。Bonnie姐就話無啲咁嘅事，佢話，「恒地旗下有過千間附屬公司，今次換董事嘅附屬公司，全部都係一啲好舊同上晒軌道嘅，唔需要林生同大老闆親自睇住，只係一般嘅董事更替動作，係正常嘅商業行為。」
佢仲實牙實齒咁講：「附屬公司替換董事並唔涉及（四叔）退休，完全無關係，而控股公司嘅董事或股權方面，亦未有計劃改變。」咁唔通今次四叔讓位畀細少，係賀吓乖孫出世？