十萬個為甚麼時間！點解風褸一加防水透氣料之名就千元起跳？問風褸名牌Patagonia：「呢股風由GORE-TEX帶起，佢亦手執技術之牛耳！」GORE-TEX薄膜每平方吋內，分佈億個比水珠細萬倍、但又比水蒸氣分子大700倍嘅微細孔，達致防水透氣，抵佢值錢！
記者：朱崇德
攝影：譚盈傑、蔡家輝
Model:Annie@GME
TakeAGlance：GORE-TEX造人工血管？
原來，GORE-TEX本來並唔係用嚟做衫！1957年GORE的創辦人BillGore發現在電纜使用聚四氟乙烯（PTFE）會有非常高嘅絕緣能力，即時被國防及電腦行業使用；1969年，連月球登陸車都用呢隻電纜，你就知有幾架勢！最大分水嶺為同年，Bill的兒子Bob將PTFE進行高速拉伸處理，變成了高密度多微孔材料（ePTFE），可以講係GORE-TEX前身！直至近代，ePTFE廣泛用於超級電腦高速電纜、人造血管、美國航天員太空服之上，就知佢對人類生活影響有幾大！
物料逐隻睇
GORE-TEX料唔止一種，各擅勝場，點揀，就視乎個人需要。最要留意嘅反而係線口、駁位越少越好，因為線口要做防水膠邊，越多線步位，防水性越難做得好，所以防水性高嘅風褸衫身線步就越少！某啲品牌為減少線口，就連Logo都改用印刷而唔用釘線！
極限ProShell：
最堅韌耐磨，採3Layer最高技術，即底、面料及中層GORE-TEX薄膜壓合成一塊，就算零下30度勁爬雪山都頂得住，不過喺香港着就太誇！線步位用GORE-SEAM防水膠帶技術，保證駁口100%防水；不過價錢下下四、五千。
全天候PerformanceShell：
功能稍次於ProShell。2Layer設計，即面料與GORE-TEX薄膜壓合為一層，底料獨立，因此上手感覺較ProShell柔軟；價位約三至四千元。Shell系另有輕薄之選，PacliteShell及SoftShell，相對防水透氣較前兩者弱，價錢一至二千元，適合香港天氣，啱行街着。
防風WINDSTOPPER：
GORE品牌另一物料。中層WINDSTOPPER薄膜主打防風保暖，輕柔度高，唔多防水，只可以講係「跣水」，雨粉粉無問題，「落狗屎」式豪雨都係搵番件Pro或PerformanceShell披吓好。
至TOP風褸推介
Patagonia專業Sales教路：「風褸主功能係防水、透氣、防風，如果真係去好凍嘅地方，要着埋透氣速乾嘅BaseLayer排汗衫打底，再加MiddleLayer保暖衣。」
保養CheckPoints
1.勿長時間浸泡：
新一代防水透氣風褸大多可用洗衣粉清洗，水溫不宜高於30-40℃，亦不可長時間浸泡，以免令衣物夾層分離，破壞防水能力。
2.勿用柔順劑：
禁用漂白水或柔順劑！漂白水會破壞布料組織，柔順劑則會殘留在布料纖維，一般棉質布料的確有減少纖維磨擦，達致柔順效果，但用在風褸就會塞住微細透氣孔，破壞排熱排汗功能。
舊風褸有滲水迹象？
可用Granger's30℃Proofer專業防水透氣褸洗衣劑，用後在褸面形成跣水層，防水能力大大改善。$149（300ml）/a
3.收藏勿壓：
防水、透氣衣多建議用衣架掛起收藏，長期摺叠或放真空袋受壓，有機會對夾層造成破壞。
4.記得Keep單：
買GORE-TEX或高質風褸多有一年保養，如發現漏水或破損都可獲更換，重點係記得Keep單。一般是先由廠方檢測，如發現非人為損毀或錯誤使用就有得賠！
5.起「泡」就要換：
一件高質量防水透氣衣大概有3至5年壽命！幾時知唔用得？發現衫身出現氣泡就係夾層開始脫離；另線步位壓膠脫落，兩者都會影響防水能力。
a. Patagonia（31882400）
b. 沙木尼登山用品（23883626）