無綫同五大唱片公司反面,令到有線、now同亞視漁人得利,頻頻拉攏五大唱片旗下歌手合作,好似最近now101台嘅《撳錢》咁,佢哋請咗班歌手跳出錄影廠拍短片,然後擺喺節目播出,等觀眾睇完之後再答問題。
日前環球唱片嘅吳雨霏(Kary)同Mr.以及杜如風幫《撳錢》拍外景,佢哋踩去馬鞍山一間泰國菜館學煮泰菜,師傅教Kary同杜如風整柚子沙律,點知佢哋一捧住個碌柚即刻話:「劈友(柚)。」跟住將個碌柚拋嚟拋去研究點劈,結果搞咗成粒鐘先至劈開個柚。
變性接待Mr.
之後煮泰菜,Kary同杜如風又搞錯晒啲醬料,Kary咁嘅廚藝,難怪早年喺《美女廚房》被封地獄廚神啦,好明顯Kary呢5年嚟廚藝完全冇進步。
唔單止咁,Kary孖住杜如風扮女接待員招呼Mr.,又鞠晒躬又講泰文歡迎佢哋,原本女仔同人講歡迎或者你好嗎係講:「沙話Dcar」點知佢哋一開聲就變咗男人語法話:「沙話Dcup」,之後又將泰文講成粗口,笑到Mr.同現場工作員肚痛。