其士泛亞（508）賣殼交易剛完成，控股權交咗畀喺內地投資公路基建嘅李光煜之後，原本嘅大股東周亦卿會淡出，只會揸住其士國際（025）。有進有出好正常，既然大股東抽身，原本嘅同路人跟住走一啲唔奇，呢個就係南豐集團太子女Vivien陳慧慧（圖）。
原來Vivien一直係其士泛亞嘅長期投資者，佢上星期四喺場外以每股0.189元清倉，套現2696萬元。陳小姐同周亦卿一齊參與投資，其實唔只呢一次！佢兩個曾經喺創業板公司北亞策略（8080），夥拍高盛等大孖沙參與小量股權投資，只係持股比例唔顯眼同表現低調，所以外界唔係好覺。
Vivien本身亦都有喺其他港股投資，好似佢最在行嘅地產咁，就曾經掂過內房股花樣年（1777），但已經喺舊年沽得七七八八。