慶祝入波都搞到停賽？真係㗎！話說喺上周六柏斯波利斯作客贏達瑪希吉蘭3:2嘅伊朗聯賽上，當佢哋班球員慶祝入波嘅時候，陣中一名叫穆罕默德諾斯拉迪（圖）嘅球員就手多多，用隻左手插落隊友舒爾斯尼沙爾個籮柚度。由於場波係現場直播，加上事後有網友將事發經過掟上Youtube，所以有數以百萬計人睇到個咁猥褻嘅場面。佢哋兩個有啲咁唔道德嘅行為，事後即時被無限期停賽，仲每人罰咗4萬美金（約31萬港元），而且可能會坐監同被罰笞刑；而佢哋話咁做無意冒犯任何人，純粹貪玩，但喺伊斯蘭國家比賽，好心就檢點啲啦！家佢哋搞到一身蟻，絕對係咎由自取。