由金融界跳到資訊科技界嘅港交所（388）前行政總裁周文耀，出任數碼港主席已有一年多，噚日佢同傳媒會面，話會將本港金融市場成功之道，複製到資訊科技業。係乜嘢？就係打開中國市場囉。
周主席話，香港今日能成為環球主要金融中心，多得90年代（佢做聯交所行政總裁期間）大量引入中國企業嚟香港上市，因而亦吸引到海外投資銀行進駐香港。時至今日，港股市值有六成係中資企業喇。
佢認為，同樣道理亦適用於香港嘅資訊科技行業。話說數碼港曾經接洽一啲創投基金，希望對方投資喺本港「初生」嘅資訊科技企業，點知對方因為呢啲本地企業業務欠缺「中國概念」，而未能成功取得資金。針對呢個關鍵因素，周文耀話數碼港已着手工作，例如喺上海設立代辦處，協助本港資訊科技界打入內地市場；而旗下舉行嘅微型創業基金比賽，亦一定要本港大學夥拍深圳嘅大學一齊參賽，確保含有「中國概念」元素。咁有心有力，睇嚟數碼港大可以喺內地開分店噃。