又有一家金融機構唔掂，華華知道唔少金融業嘅打工仔家都好緊張，擔心年底前收信，華華以「自求多福」來共勉，即係叫大家齊齊增值。
正如好似里昂證券分析員ScottLaprise咁，佢近日就出咗一份關於內地汽車股新推SUV（多用途房車）嘅報告，比較一下比亞迪（1121）同長城汽車（2333）新推出嘅S6同H6，Scott呢份報告特別之處，唔係隨便講吓銷售數據，或者channelcheck，而係佢親身試過兩款車。
華華覺得份報告所寫嘅觀點，真係從用家角度去出發，就好似佢提到，雖然長城H6車身較短，但後座空間就較比亞迪S6多。
而Scott又提到，內地車主多數都請司機，即係自己要坐後座，如果後座空間唔夠，對腳就唔多舒服啦。如果自己係司機呢，Scott就話H6個軚盤係用軟皮包住，感覺好實在，直頭同寶馬有得揮喎。
揀車非靠名氣市值
講到咁，話之你間公司有股神畢菲特撐腰，Scott都係揀長城嘅H6啦。所以話，雖然比亞迪市值大過長城汽車，不過，有時唔係一定信名牌嘅。
李華華
mailto:[email protected]