向來《FinalFantasy》系列都係唯美派代表，最新作《零式》唔喺PS3推出，改為PSP上登場，好在有7位型英帥靚正男角，再加7位條裙短到「犯晒校規」嘅長腿妹，視覺上已令人神魂顛倒，連遊戲系統都夠複雜同襟玩，難怪機迷勁讚外傳嘅質素，絕對拍得住正牌續集！
記者：許福合
最複雜《FF》
PSP版《零式》屬外傳式作品，玩家操控嘅14名角色，皆是魔導院學生，身穿西洋風格校服，相比傳統戰鬥服，特別醒神！第二章開始，14人已一次過齊集，雖然套衫Fashion到一啲都唔似返學，不過見到女角們上陣殺敵時又踎又跳，身上條短裙仔飄吓飄吓咁，仲可送禮物同泳衣畀女教官，滿足一下兒時迷戀Miss嘅心願，今勻姑且原諒佢嘅超現實啦。
戰鬥系統頗複雜，分開物理近戰同魔法遠攻外，14位主角仲各有獨特攻擊技能，隊員有啲初期弱雞，但中期學會某種技能後，勁到可當「膽」嚟用，有啲擁有嘅魔法又彌足珍貴，每次出戰要揀三人編為一小隊，淨係諗點配搭、取長補短，已經頭都大埋，仲要記住每人有乜招、裝備啱唔啱，比《FF12》配Auto指令更麻煩，玩咗咁多年《FF》，今集都堪稱最複雜喇。
老朋友召喚獸登場
上網睇機迷留言，除咗對AP同戰鬥系統有疑問之外，任務亦係最多人感到困難嘅地方。首先，玩家除咗參與故事相關的主線任務外，仲可進入大地圖與敵方交戰，接受的指令會實時按戰況而改變，內容包括限時擊倒指定數量的敵人、解放敵方設施或擊倒指揮官等，若果無法完成或時限結束，都會當作任務失敗，類似SLG嘅戰略玩法。還有軍神系統，即係《FF》嘅召喚獸，以犧牲其中一位隊員生命，換嚟強勁嘅召喚獸幫拖，能在限定時間內提供強大火力輸出，暫時遇到嘅軍神，已有齊冰女、火魔、奧丁、巴哈姆特等「老朋友」，對《FF》死忠嚟講，一定好親切。
《FinalFantasy零式》
平台：PSP
類型：RPG
人數：1人
開發：SquareEnix
售價：$558
