台灣組合S.H.E成員任家萱（Selina）前晚同律師男友張承中結婚，城中政商同影視界好友都有嚟飲喜酒，而且圈中友好如周杰倫同張惠妹都畀咗新台幣66,000元做人情，舊愛羅志祥（小豬）雖然收唔到請帖，但傳出佢做咗厚禮人情，但查實係誤會一場。
原來小豬經理人私底下同Selina有交情，雖然冇去飲，仍託友人送上禮金，結果俾網友誤解為小豬送禮。前日嚟咗香港嘅小豬噚日大方送上祝福：「祝福她新婚快樂，每天都要很幸福喔！」
台灣首富郭台銘（郭董）前晚同太太曾馨瑩（狗狗）到賀，曾與郭董傳緋聞嘅林志玲都有嚟飲，今次係郭董婚後首度同林志玲碰頭，二人分坐隔籬桌，郭董席間主動帶狗狗去跟林志玲敬酒，短暫寒暄，郭董夫婦隨即轉同其他嘉賓敬酒，林志玲唔知係咪怕尷尬，逗留一陣就提前走啦！
三姊妹鬥快喊
前晚婚宴結束後Selina同阿中的雙方父母、好友Ella、Hebe一齊再出席小型家庭聚會，三位姊妹一齊比賽睇吓邊個最快喊，結果Hebe忍唔住先喊咗出嚟。
