最近有個江湖傳聞話金牌監製夫妻檔「生蠔哥」同「攝青姐」將會過檔「百科」嘅免費電視台，不過關仁收到風，百科之前的確係同佢兩公婆斟過，但最後百科因為成功搵咗金牌寫手「飛標」，所以攝青姐同生蠔哥肯定冇得過檔。
事關飛標同生蠔早年合作已經反晒面，飛標今次答應百科過檔，條件之一就係百科唔可以搵生蠔同攝青，由於百科認為一部劇成唔成功係睇劇本同演員，既然飛標過嚟幫手，佢亦尊重對方意思。再講，百科嚟緊方針係拍劇搵寫手做主導，而唔係過往電視台咁監製做話事人，既然係咁，根本唔使咁多人工請個監製過嚟，不如將嚿錢用嚟請多幾個好寫手好過。
撰文：關仁