大勝完車路士一場5:3，阿仙奴唔覺得去到最頂峯，但起碼都叫走出季初嘅陰霾；阿仙奴嘅最大股東、美國商人高安基，周一更極罕有風騷地到兵工廠練習基地觀操，又走入阿仙奴更衣室，第一次喺領隊雲格同眾球員面前勉勵一番，仲暗寸同樣由美國人控制嘅曼聯，搞體育唔一定使得多錢先成功。
「我係曼聯迷都嘩一聲」
阿仙奴贏完車路士，聯賽就爬番上第7，比最低跌到去18位好番好多，原來上周六對車路士大戰，高安基都係座上客；完場前同阿仙奴球迷一齊威風咁步出史丹福橋球場，而且高安基亦對雲格充滿信心：「佢係一個偉大嘅領隊，佢過去工作出色，絕不能因一場兩場勝負，就判斷一個領隊。」
讚完職球員，高安基就轉寸死敵曼聯；高安基08年開始入阿仙奴董事局，多年嚟用咗5億鎊（約61億港元），收購阿仙奴66％股權，但球隊一直冇冠軍，而維持量入為出哲學，亦被球迷批評。不過高安基就暗寸控制曼聯嘅格拉沙家族；高安基話：「佢哋贏盡錦標，又增加大量收益，如果我係曼聯球迷，我都會『嘩』一聲。」但喺美國同樣擁有NBA丹佛金塊嘅高安基又講：「我有啲搞運動球隊嘅朋友，3、40年都冇冠軍，阿仙奴呢幾年都同冠軍好接近啦。你要我使錢，冇問題，但我想要一個持續而有效嘅營運方法，喺美國，湖人都花費唔少錢，但唔係冠軍保證，亦都有小球會成功嘅例子，呢個亦都係阿仙奴固有嘅方針。」言下之意，即係唔使旨意阿仙奴斥巨資收購球員啦！不過據統計，格拉沙將5億鎊債轉給曼聯，而又領取1,610萬鎊管理費，邊個係好班主，球迷自行判斷啦！
藍斯舊患紋天使添信心
其實阿仙奴兵源唔算差，季初成績唔好多少因為傷兵。好似10年斷腳嘅中場艾朗藍斯，康復後漸漸上力，今季成為中場主力，佢為咗增加信心，特登喺左腳舊患紋咗天使聖米迦勒落去，舊約聖經中，聖米迦勒喺最耀眼同威武嘅天使，仲同撒旦戰鬥㖭，睇吓艾朗藍斯有冇得到聖米迦勒嘅神力嘞。不過長期受傷嘅韋舒亞，復出無期，佢就好得閒做急救大使，仲同假人示範人工呼吸，希望佢唔使其他人急救佢就好。
