「年紀大，機器壞」，就算係英格蘭06年黃金一代，都不能倖免；上個周末，英軍嘅黃金一代代表人物謝拉特、泰利、里奧費迪南等相繼失威，而遠走美國嘅碧咸，就有好貨交，唔通英格蘭本土，對英格蘭人都唔老利？
英格蘭除咗1966年主場攞過世界盃冠軍，之後國際大賽都係名大於實，2006年世界盃都係熱門分子之一；領隊有艾歷臣，當打球員就有謝拉特、林柏特、泰利等，又有後起之秀朗尼；3線可謂粒粒皆星，結果8強就互射12碼下俾葡萄牙淘汰，再一次令國民失望。
謝拉特傷口感染要唞
經過5年歲月洗禮，朗尼已經成為英格蘭及曼聯獨當一面人物，但其餘主力似乎唔多掂。好似利物浦嘅謝拉特，上周六對西布朗嘅聯賽又缺陣，周日更右腳打晒石膏撐晒枴杖步出醫院，搞到一班利迷好擔心。原來「神奇隊長」上周五練習時受傷，佢冇好好處理傷口，搞到受感染。
謝拉特周日到醫院就係處理好傷口，好彩唔算嚴重，利物浦領隊杜格利殊就話：「謝拉特肯定代表唔到英格蘭對西班牙，相信要休息一個月先可以復出。」其實謝老四今季初受鼠蹊傷影響，至今只踢咗4場聯賽，代表作就係對曼聯先開紀錄，好彩今次傷勢唔重，唔使等到下年2月11日作客曼聯，先有機會復出。
泰利、里奧皆失意
講起06英軍黃金一代，一對中堅泰利同里奧費迪南，當時都算係歐洲一線中堅組合，可惜兩人上周六都十分失意。先講泰利，佢代表車仔主場對阿仙奴，完場前跣腳俾尹佩斯單刀建功，射入反超前一球，最終更大敗3:5，搞到領隊波亞斯好嬲，周日操練時大鬧車仔眾將。
曼聯上周六就贏波，但就冇里奧份，事關里奧對曼城時失準，俾費Sir雪藏，作客愛華頓坐足90分鐘後備席都冇份出場。盛傳里奧想退出國家隊，專心踢好球會級賽事，以爭番曼聯個正選位喎！