雖然廣管局仲未正式發出新免費電視牌照，但已有「潛在」新營運商落力做嘢，其中一個肯定係魔童、城市電訊（1137）主席王維基（Ricky）。
Ricky最耍家係先聲奪人，即係話：人未到、聲先到，雖然未獲發牌，但已經響晒朵話要豪搞。佢除咗向TVB（511）高調宣戰，展開連串挖角行動，唔止撬藝人，仲撬咗大班幕後製作人員，聽講已有過百名編劇、編審、導演等專業製作人才落實轉會，相信唔少嚟自TVB。
可能Ricky諗住班員工慣咗喺將軍澳堆填區返工，新起嘅多媒體創作中心選址就喺將軍澳堆填區。城電發言人話，呢個投資額達6億銀嘅創作中心，家陣係「入則」階段，預計工程開始後，2013年可以投入運作。
出入堆填區嘅華華近日見到，城電喺塊地皮上面戙咗有兩個貨櫃咁大嘅展示板。發言人話，目的係希望加深大家對呢個中心嘅印象，作為一個溫馨提示。根據堆填區嘅地形，城電塊地位於堆填區必經之路，即係話，除咗華華，同處區內嘅TVB中人每日返工都會見到，有時「提示」定「示威」，都係一字之差。