內地互聯網民企巨頭嘅騰訊（700）主席馬化騰經常一副氣定神閒嘅樣，以為佢天不怕地不怕，原來佢都會有嘢擔心到瞓唔着覺。
馬化騰最擔心係乜？唔係有人挑戰巨頭地位，而係用戶資料外洩。佢噚日喺北京出席會議時話，公司初創前兩年發生過火災，所以憂患意識好強。
馬化騰驚用戶資料外洩，佢仲話，互聯網行業任何創新，都可以喺一秒內使全行發生顛覆性變化，所以公司發展上好多事情都令佢夜不能寐。
未完，仲有！佢仲擔心公司發展規模大咗，可唔可以保持細公司一樣咁靈活，唔會因為官僚，對用戶需求反應慢咗，喺具體業務上，令到騰訊同其他細公司相比時冇咗優勢。
數埋數埋，其實都唔少嘢令馬化騰瞓唔着，睇嚟佢都要執番劑寧神安睡茶飲嘞！