藺大師藺常念，除咗係香港財經節目嘅常客，原來已經跳出國際，佢月中接受俄羅斯電視台節目《RussiaToday》訪問，條片喺Youtube都有得睇！
越洋訪問講政治
藺大師用中文做節目，大家聽得多，但用英文接受訪問，大家少見。事緣俄羅斯總理普京10月中訪華，同胡主席及溫總見面，咁大單新聞，《RussiaToday》就搵藺大師越洋做視像訪問。
華華噚日特登搵藺大師，問佢同俄羅斯電視台有乜淵源，佢話幾乎每日都接受美聯社訪問，美聯社會將片段賣畀全世界嘅英文電視台，就係咁無啦啦上咗《RussiaToday》。
藺大師仲牙擦擦咁話，「歐洲擺明係想搵中國笨，自己使晒啲錢，就要中央政府埋單，我英文咁叻，接受外國訪問冇人比我表達得更好！」
咁啱藺大師同黃偉康合作搞嘅靈獅控股前日開幕，但當日好似唔覺藺大師出現，唔係有乜嘢吓嘩？藺大師話自己特登唔上鏡，「我又唔係老闆，又唔係股東，去到只係撐場支持，唔可以妹仔大過主人婆，同人哋搶鏡吖！」藺大師咁樣講，反而令人覺得真係有啲嘢，希望華華諗多咗！
李華華
mailto:[email protected]