馮仁昭四圍超：丁子峻娶妻　丁子高着肚兜 - 馮仁昭

娛樂圈呢個月喜事重重，丁子高堂兄丁子峻噚日喺杭州同拍拖10年嘅女友吉祥舉行婚禮。杭州美女吉祥做過藝人，之後退居幕後，06年丁子峻同吉祥靜雞雞喺香港註冊，噚日先正式舉行婚禮。丁子高今次去杭州做兄弟兼做婚宴司儀，導演唐季禮就做證婚人，點知噚日北京大霧，飛機延誤，唐季禮惟有改由陸路趕去參加婚禮。

噚日朝早8點幾，丁子峻同成班兄弟出發接新娘，估唔到忙緊娶老婆嘅佢，仲掛住微博直擊自己婚禮。丁子峻出發接新娘時喺微博話：「昨晚一夜沒睡，就好比小時候第二天要去學校旅行一樣，期待着明日的旅程，今天我將會進入人生新的旅程。」

蜜月探訪小朋友

丁子峻接新娘要過關斬將，其中一關要班兄弟着肚兜，場面都幾搞笑。噚晚一對新人擺咗50幾圍酒席，由於兩公婆都熱心公益，所以度蜜月決定去甘肅探訪受捐助嘅小朋友。