恭喜！今年娛樂圈又多一個女星加入靚太行列，今年39歲嘅趙學而趕喺40歲前嫁人，將喺本月26日結婚擺酒，同拍拖八年嘅圈外男友Alan結束愛情長跑拉埋天窗。聽講佢老公係建築師，有為能幹，學而終於搵到幸福，馮仁昭真係戥佢高興。
噚日學而喺微博分享佢嘅喜悅，準新娘透露上周六過咗大禮，仲話今日開始發出紅色炸彈，又貼上兩人嘅喜帖。喜帖上印有準新人嘅甜蜜合照，學而從後攬住未來老公膊頭，露出幸福笑容，再配上紅噹噹信封，喜氣洋洋。
好友設計婚紗
學而又吐露籌辦婚禮心情：「原來準備派帖都會心情緊張㗎，我呢啲膽生毛都怯怯哋。」契姐伍詠薇同草蜢嘅蔡一智等紛紛喺微博恭喜同祝福一對新人，話等待迎接佢哋嘅喜彈。學而同馮仁昭講，婚紗由婚紗設計師好友Isabel幫佢造，婚後未有打算即刻生BB，佢同老公都好享受二人世界，婚禮都希望低調啲，只係一個簡單派對。
學而參加華星新秀大賽入行，但佢喺大賽只得到前三十名就被淘汰，之後加入無綫拍劇再出唱片，學而專一又長情，喺娛樂圈咁多年，只傳過佢同謝霆鋒拍拖。