疑似特首候選人梁振英不再續任城大校董會主席，第一個三年期滿即刻鬆人，當然係為咗更宏大嘅目標而努力，大學校董會主席對佢嚟講，並唔係重要職位。究其實，振英哥已經做過兩間大學主席，先做嶺南大學六年，期滿就過檔城大做多三年，對本地大學教育之認識比其他人深厚好多，但即管如此，聽講佢對城大裏面之政治角力，仍然感到吃力。城大中人話俾左丁山聽，大學內教職員之中，有太多聲大大嘅民主派喎，其他人冇振英哥之政治手腕，冇佢之經驗，唔怪得即使受到特區政府邀請做城大校董會主席，仍然唔肯，唔敢制。
振英哥做城大校董會主席，幾有魄力，力撐郭位校長，即使大學教育資助委員會唔同意（主要因為成本好高，本港未必有迫切需要，例如與擴充醫科生學額相比），不肯撥款，仍然在離任前九日說服校董會通過開辦動物醫學院，郭位校長亦夠牙力，事先講掂教務委員會成員，一致通過開辦。大學之教務委員會（Senate）由各學院院長，系主任，講座教授，教授等學者組成，佢地並非省油的燈，有咗tenure（實任，大學不能隨便炒佢地，事實上係終身職位至退休年齡為止），一啲都唔怕大學管理人員，大學管理人其實怕咗呢班大教授，故此佢地肯一致支持校長推動一個教資會唔贊成嘅動物醫學院，難得到極。郭位為動物醫學院拚命，梁振英臨走力撐，睇嚟任何一位社會名人接任城大校董會主席，只能義無反顧地向前行，背上籌款幾億以至十億元嘅大責任，現在已有邵氏基金、劉鑾雄慈善基金捐款支持，但自資辦理動物醫學院耗資甚巨，於2013-14年招收新生咯喎，籌款急不容緩，新主席要大大加油呀！
城大辦動物醫學院，有名牌大學幫手射住陣腳，就係田北辰二少之母校Cornell，康奈爾大學之獸醫學院享譽甚隆，在美國數一數二，會幫助城大籌劃建立，運行以及質素保證提供諮詢與協助，在城大攻讀動物醫學嘅學生，學費雖然貴，應會覺得物有所值。