喺歐洲效力嘅英格蘭黃金一代，個個唔如意，但跳出歐洲，喺美洲大陸發展嘅中場碧咸，就闖出一片天。36歲嘅佢日前喺美職聯季後賽西岸準決賽首回合，做出一個靚助攻，協助球隊作客以1:0擊敗有法國前鋒亨利壓陣嘅紐約紅牛，由於銀河喺次回合有主場之利，銀河晉級機會高唱入雲，唔怪得之銀河話無論如何，都想盡力留住今季之後就會滿約嘅碧咸啦。
唔單止係咁，喺銀河作客紅牛呢場波，啱啱喺巴甲助山度士大演帽子戲法嘅巴西超新星尼馬，都嗱嗱臨趕嚟做座上客，尼馬仲喺賽前送咗個波畀亨利，又好似小「粉絲」咁同碧咸合照，可見「萬人迷」真係魅力沒法擋！