講真，知道這個消息比得悉徐立之辭職，唔做港大校長，更感意外，倍覺傷感。打開報紙當天，見到「35年盛事冇錢搞，維園網賽玩完？」這條標題，心往下一沉，但那個問號是甚麼意思？還有轉機嗎？
用樂觀的性格去睇，機會渺茫，主辦機構發言人表示將原本一年一度在1月初舉行的比賽押後至9月，希望盡努力在此段時間爭取贊助商支持，如果最終仍未能有白色武士出現，賽事便要取消。
叫我傷感的是，在香港歷史稍悠久的賽事都受詛咒，遭殃。不是嗎，最悠久的甲組足球聯賽，贊助商日少，早已久延殘喘！羅傑承這幾年出心出力，算係功德無量。
近年辦得較好的馬拉松，全靠渣打的財力，14年下來，參與的人士由1,000跳到6萬，還要市民全情投入。又像剛復辦的渡海泳，也有新世界這條大水喉照住。話時話，香港大企業那麼多，真係冇人肯畀錢？計吓數，匯豐搞高爾夫球，恒生支持精英運動員，新鴻基，長實，又有乜嘢支持緊呢？
我做娛樂版出身，對上市公司了解不夠，但邊個有錢佬捨得使錢就好清楚，香港有兩個有錢人值得主辦單位打打主意。第一個係剛剛90大壽的壽星公何鴻燊，由我做記者那日起，便知道他每年都拍住當年仍健在的霍英東，參加中華遊樂會的元老級網球雙打，次次都贏，我懷疑過佢哋地位高，冇人敢贏佢哋，所以叫賭王做贊助，佢未必唔制！
另一個叫樂裕民（BruceRockowitz），娶李玟的利豐集團CEO，Bruce最初由加拿大初到香港係做網球教練，家陣做到CEO，仲係前港督彭定康（佢早兩日喺Bruce個婚禮，親口同傳媒講我至知）波友，據報身家有30億港元，最難得係佢捨得使，你睇佢個婚禮係咁意都使1.5億，唔打佢主意，仲有邊個好得過佢？
文：盧覓雪