當年《侏羅紀公園》一隻隻史前恐龍活現銀幕，逼真CG加強勁音效，更令該片成為歷代試機天碟。今次BD版三部曲套裝，靚上1080p加DTS7.1，將速龍敏捷同暴龍霸氣，全部活靈活現，今時今日依然震撼到你。
記者：韓繼聰
攝影：陳盛臣
限量8"Figure周街斷貨
等完藍光《魔戒》三部曲，今年最令影音迷期待嘅，肯定係《侏羅紀公園》套裝。未講聲畫靚上高清修復，單睇佢從未曝光、接近兩粒鐘嘅Bonus同全新訪問，已經充滿誠意，令BD版收藏價值大大增加。你會見到，當年拍攝呢堆龐然大物，製作上有幾高難度，睇完Bonus，相信會再令你感動多一次。另外，藍光套裝同時推出限量珍藏版，重點係一大個包裝盒，內裏收藏一隻8"高暴龍情景模型，造型及上油算相當精美，一望隻Figure，《侏》經典背景音樂又再喺腦內響起。雖然比普通版貴四嚿水，但據旺角DVDPro講，暴龍版一早已斷貨，想買都要落柯打訂。
暴龍踩場一步一驚心
《侏羅紀公園》之所以成為一代試機天碟，除咗因為佢嘅CG喺當年超晒班，啲恐龍真到嚇親人之外，聲音效果也絕對應記一功。亞洲高清協會主席AlanLee表示，《侏》片早在LD年代已經係試機必備碟，可謂唔買唔得！今次嚟到Blu-ray，提升到7.1聲效，表現又係點呢？Alan就話，始終都係差不多廿年前嘅製作，聲音嘅頻寬相對較窄，空間感和高音點都爭少少。但環繞聲效就交足功課，雨聲、恐龍聲清晰呈現於四周，恍如置身其中。特別係經典暴龍現身一幕，腳步由遠致近，絕對一步一驚心！而隨着拍攝技術進步，二、三集音效亦越聽越正，清晰之餘亦夠自然。講埋畫面，經過數碼修復，畫面清晰細緻，光暗表現俱佳。唯一奇怪係第二集畫質明顯較其餘兩集差，據Alan解釋，原來那時期CG多的電影均有相同問題，可算係非戰之罪。總括嚟講，成Set碟聲畫表現都相當出色，而且夠晒經典，抵買！
