已經仙遊嘅蘋果教主喬布斯，一句「求知若渴，虛心若愚」（Stayhungry，stayfoolish），成為近期「潮語」。乜嘢先係真正虛懷若谷，啱啱去完印度，跑完馬拉松嘅恒生銀行（011）助理總理經兼公關「阿頭」張樹槐（Walter），相信先至能夠真正體會。佢嘅喜馬拉雅山之旅，仲感動埋17歲乖仔，以父親為榜樣，上個禮拜完成自己歷史性11公里長跑。
人稱「水哥」嘅Walter，愛跑如命，賓架界皆知，過去10年，水哥跑過嘅馬拉松同超級馬拉松賽事共31項，合共逾1500公里，比香港飛去西安嘅距離仲遠。佢同華華講，今次印度長跑意義特別深刻，前所未有，澎湃心情，家陣仍然「沉澱」緊。
征服海拔萬二呎
全程160公里嘅喜馬拉雅山超級長跑，係全球最艱巨賽道之一，最高達海拔萬二呎。水哥記得，抵達終點一刻，好多跑手都不期然滴下英雄淚，互相擁抱。
同時環覽世界五大高峯中嘅四嶽，佢話大自然景色壯麗動人，即使無任何宗教信仰，都令人屈膝折服，賽跑期間嘅心路歷程，就好似賽道咁崎嶇起伏，雷雨交加：偉大、震撼、卑微同渺小，非筆墨能形容。
5日風餐露宿，同路人互相扶持建立嘅友誼，亦唔係一般競賽奪標後嘅興奮可比。水哥回憶，賽道上，同兩位齊以跑馬拉松慶祝50大壽嘅英國「男子漢」（警察），結成老友，大家仲約定，無論邊個先抵終點，一定等埋對方，3個「馬蘭奴」要齊齊握住手衝線！
馬拉松重點係過程唔係賽果，佢話攞咗冠軍嘅人亦唔會耀武揚威，因為長跑太艱苦，能夠齊齊整整跑完返歸，已經好感恩。
香港亦有聞名世界嘅全馬賽道，但近年社會充斥負能量，人人淨係識審時度勢，利益掛帥，港人真係好應該落場體驗吓馬拉松精神！
李華華
mailto:[email protected]