梁振英和唐英年假如是兩份快餐，中午時段，人頭湧湧，點都要揀一份鯁落肚，你要A定B？兩害難以取捨，打工仔不妨這樣諗：唐英年有「做功課」，精於「課外活動」，「體能」明顯勝過他的前任，絕對不是打針雞可比，應該幾有營，唔怕他爆塑化劑醜聞。
面對傳媒質問，唐英年還會面紅愕然，證明面皮不算發水，還有些少「禮義廉」的實用面積。揀他「落肚」，相信不會像鯁了兩斤番薯，谷到一肚響屁沒處放。
「缺失」負面新聞很早出爐，攤到凍，亦即是說，社會已經消化得八八九九，揀他，估計頂籠肚屙，不致胃出血。
唐餐賣晒，只剩梁餐又點呢？同一道德水平睇，梁振英的投共傳聞就算屬實，論資排輩，他只是粗菜一碟，農藥有機會超標，但未致用地溝油，有可能腸胃炎，但食唔死人。
評論指梁出晒名是變色龍，今時今日，政客只要不是變色豉油或者化學蛋，將來甚至龍變鳳，叉燒變斑腩，三層丁屋變二十八層豪宅，都預咗佢。你老闆，冇得揀，嘟卡找數啦。