王浩信同陳自瑤噚日接受商台節目錄音訪問，佢哋話下月11日註冊結婚，會搵羅仲謙、黃長興、蕭正楠、C君、胡定欣等做兄弟，陳自瑤就搵圈外朋友做伴娘。王浩信希望35歲前做爸爸，仲想生兩個，最好一仔一女湊個好字。佢哋話曾陷情變危機，主因係性格差異，一動一靜，成日有拗撬，後來靜落嚟傾談同互相遷就，先可以維繫到段感情。