周杰倫（Jay）最近同模女友昆凌打得火熱，但黑開有條路嘅佢，同親昆凌鬼祟拍拖都斷正，搞到佢頭都大埋！Jay大嗌Whyalwaysme嘅同時，居然諗到條橋惡搞狗仔隊，就係喺新歌《驚嘆號》嘅MV度，以蘋果動新聞式嘅animation交代自己大戰狗仔隊，boss仲十足十黎智英㖭！
《驚嘆號》話就話係勵志歌，但起首第一句「這街頭，敵意多，煙硝瀰漫不了我」，擺明講緊咬住佢唔放嘅狗仔隊。MV中，愛耍帥嘅Jay繼續當自己係救世主，佢揸住J字號跑車喺公路片嚟片去，左閃右避一輪狗仔隊後，硬闖入一幢建築物。之後Jay分別以Matrix嘅身手、發哥嘅雙槍法KO對手，一路殺到去bossroom，原來，疑似肥佬黎已經恭候多時。
大戰一觸即發，紅衣人突然殺出同Jay對戰，疑似肥佬黎先後掟出兩個蘋果，第一個誤中副車，第二個就畀Jay削開。新歌擺明影射狗仔隊，Jay就話呢種表達手法係黑色幽默。
《驚嘆號》被指抄襲
另外，《驚嘆號》被指涉嫌抄襲英國樂隊TheProdigy嘅《Omen》，兩首歌嘅結他編曲好似。負責作曲嘅Jay噚日透過所屬公司回應：「我的字典裏沒有抄襲，因為我的創意無限……我用膝蓋想都可以想出超勁旋律。」