發展商有心出貨，可能驚越遲越難賣，重施叫高開低此舊瓶新酒，但又唔敢開價太低影響市場心理，預了賣一段時間方可賣得晒，好似將軍澳領凱和香港仔深灣9號，出了九牛二虎之力，先合共賣出近1000個單位，反映市場少了需求，買家未敢貿然入市，縮沙者是明智決定。
自從運輸及房屋局和消委會公佈一手樓規管進入立法程序倒數一年，好多發展商都未敢在呢個時候過份進取，一方面觸動政府，另一方面買家亦重視了買樓權益，故採取谷代理多過谷買家，依足規矩賣樓。當然亦有部份灰色地帶未依例跟從，好似發價單前預留工作仍然秘密進行，待發展商搵到買家後才發放成交消息。
老樓認為規管事在必行，老友記毋須心急驚買唔到樓而入市，喺家個調整市隨時高位入貨，不要俾一些甜頭被騙入局，尤其是賣樓花時，發展商如何講到設施美輪美奐，始終都是一個假象並不真實，按會所設施實際用途考慮方為上算。
樓市周期性剛剛開始，十多年前豪華設施只呃到內地客，港客無謂跟風，要物有所用，計計實用面積呎價，方能直接比較，雙軌並行始終不是官府原意，室內面積才是最公道。
舊區新盤率先遭殃
因此，過去一段時間，用軟件配套和增值服務來墊高樓價的假豪宅，在跌市中最傷，通常在入伙後便現形，樓價走回同區二手樓價水平，能否收到好租金來頂住樓價，老樓從來不相信同一個地段可以高好多，所以近數個月入伙的新盤，租金露了底，只較同區同價甚至低於同區市價，好明顯用家好精明，那些增值服務抵不上高兩成租值。
豪宅最講地區和地段，除了物業配套外，還有周遭環境和設施來配合支撐，所以港島南區呎租逾100元，即使傳統豪宅區租值亦往往叫高五成，何解？
那就是企業租客願意以這個價值來租樓，物有所值。
假豪宅跌勢將成，尤其是在去年樓價高位開售的舊區新盤，首先遭殃，投資者又受到禁售樓花期限制未能走貨，明年跌市時隨時變為蟹貨，兩頭唔到岸。
劉兆昌
http://www.HKLau.com