香港美酒佳餚巡禮（HongKongWineandDineFestival），自十月二十七至三十日舉行，地點係西九龍海濱長廊，十月二十六日有預展，請傳媒記者參加，十月二十七日中午，旅發局主席田北俊招待報紙老總、電台節目主持、自由人作家等等到西九海濱長廊視察，順便試酒及吃午飯。下午六時就舉行開幕晚會。
去年左丁山參觀過一次，今年似乎有更多參展商，尊尚品酒區面積比去年更大。聽旅發局中人講，今年係第三屆，明年在西九辦第四屆，後年西九文娛藝術區開始動工，會搬去啟德郵輪碼頭外舉辦。香港地方細，搵一處大地方辦美酒佳餚展甚有難度，西九長廊確係理想地方嚟嘅，近在海邊，六時後嘅夕陽美景全港第一，在此品嚐美酒，無以尚之。
自撤銷葡萄酒稅後，香港人對葡萄美酒興趣大增，各國美酒湧到，價錢便宜，無怪葡萄酒生意興旺，前年估計有四五萬人入場，點知有七萬人，去年估計有八萬人，點知到咗十一萬，今年又點？旅發局都唔敢估計，只要天氣好，唔落雨嘅話，西九長廊必定逼到爆，咁鬼興旺，唔怪得一位傳媒好友在品嚐紅酒時講：「呢個時候會諗起唐英年。」於是大家問田少：「會唔會邀請兩位疑似候選人到此一遊呀？」田少猶疑咗一陣，對我哋講：「唔，CY唔飲酒嘅，請都怕佢唔嚟；Henry當然係專家，不過費事有人向佢推銷紅酒啦！」大家嘻哈大笑，舉杯飲過！
田少自己都係專家，此日午餐由旺角朗豪坊明閣及日本餐廳大廚親自監督炮製，由朗豪坊品酒名師選紅白酒配合每一道菜式，進餐之前，請一位酒杯專家介紹不同酒杯對紅酒、白酒之香味及入口味道之影響，左丁山孤陋寡聞，睇完，聽完專家示範，自己照做，先知道幾隻不同形態嘅酒杯確係會產生不同酒質印象，又學咗嘢，以後買酒杯要講究一啲！朗豪坊產品冇得彈，吃甜品之時，田少親自挑選德國icewine配合，就係2003GeisenheimerRothenbergRieslingEiswein果然產生奇妙效果。好彩呢日夠晒醒目個個唔揸車啫。