人稱謝老總嘅謝炳奎（圖），高齡89歲，喺香港童軍界冇人唔識，皆因佢係童軍總會前維多利亞城區總監。謝老總13歲隻身由汕頭來港，讀聖保羅書院，見到師兄着制服好威風，於是走去做童軍。
童軍唔係童子活動咁簡單，謝老總二次大戰時期，做過防空護衞隊（ARP）成員，負責用單車傳訊；1941年12月初，日軍突襲香港，聖保羅書院變成救傷站，謝老總當值，有日去中環雪廠街隔籬聖斯酒店（即現公爵行舊址）食午飯，以為好安全。點知當咗幾日更，日軍掟燃燒彈到中環街市旁，佢同隊友去救人，「我負責抬住對腳，另一個人抬個身，點知抬起時，發覺原來個身同對腳已經炸到分屍」。
謝老總呢啲驚險故事輯錄成書，可惜不公開發售，想睇就要問吓有冇童軍朋友幫手訂。童軍日行一善，肯幫手嘅。