靚唔係新樓專利！走訪本報讀者位於觀塘逾三十年樓齡之家，十呎特高樓底，闊落感非一般新樓可比；特大陽台變優閒小庭園，楊子東師傅重話：「陽台食正文昌位，加張白梳化、四個綠色咕就係『水風井』格局，大大趨旺文昌！」
記者：朱崇德
攝影：蔡家輝
Model:Rainbow、Ben@GME
鳴謝：楊子東師傅
拆盡間隔牆 勁開揚
一個八百餘呎、逾三十年樓齡舊單位，好難想像屋主肯投資上三十餘萬粉飾裝修，但屋主Eric大讚：「舊樓嗰種空間感非一般新樓可比擬！」拆全屋間隔牆變身兩房大單位，全屋乾淨利落不見雜物，除了是屋主愛整潔的習慣，更全賴十呎特高樓底造就了兩個闊八呎、「頂天立地式」大櫃的收納空間。入門走過一道中國古風小長廊後，開闊的客飯廳雖並不實用的鑽石形，但廳中一道花卉牆拉扯你的眼球，聲東擊西，輕易掩飾了五角廳的瑕疵；遙遙呼應的是特大的露天陽台，小白傘配白家具，綴以綠葉植物，看着看着，就有被吸引進去、泡杯清茶坐上一個下午的衝動！
水風井 一四增文昌
勘輿學家楊子東師傅：「全屋最好風水位就係陽台，正正係文昌位！」文昌本主讀書，如果屋主打工或做生意，坐正文昌位每每令人諗到發財大計！「最好之處，係佢用上白色梳化加四個綠色咕，就變成『一四』增文昌『水風井』格局；道理有如『井裏有水、直上直落』，只供自家人飲用，不會外流，完全符合呢間屋嘅佈局；剛剛來到，我以為屋主經高人指點，不過，如果屋主本身行正大運，有時做咩決定都會不經意啱晒間屋嘅需要。」
水吧財位 飲水吸財
全屋財位就在客飯廳雪櫃及小水吧位，點先吸到呢股財氣？「呢度係『九宮飛星圖一六位』，一管智慧人緣，六屬金，金生水，常坐於此，智慧會源源不絕；每當你口渴走向水吧財位取水，就萬事大吉！」
廁落病位 小心身體
全屋風水真係毫無弱點？「病位！又稱五黃位，啱啱係廁所位，有啲師傅會話係好事，我就有保留，因為全屋人每日總要出出入入廁所好幾次，如果廁所係病位，就要特別注意清潔及空氣流通性，以改善氣場！另外，淋浴間擺件紅色浴衣，紅色代表火、火生土，五黃位最忌紅色，所以浴衣應改為白或金黃色。」
子母門 影響交際
「一出電梯，右手邊就係大門！近電梯會有旺嘅氣場，缺點係大門為子母門，門框雖大，但真正出入位只有q，如果體形較大，出入時無法大搖大擺，經常要閃身出入，會對交際或工作運有壞影響，建議將大門變成一道趟閘，就可解決問題！」
