重新穿上跑鞋，開始雖不短也不遠的練習之旅，走到熟悉的私家跑道，一趟跑來卻發現嘩，乜咁有新鮮感，直頭係練跑之餘，經歷了一轉香港文化之旅濃縮版。
各位團友，我們的旅程由西九海濱到黃埔海濱，快則一粒鐘，慢者鍾意睇風景的兩個鐘點都行完。
西九長廊作起點，貪其夠空曠，但這天有點不同，周圍擺滿了紅酒試飲，乜事，好在係起點，若果調轉係終點，個個跑完都飲到暈得一陣陣。
轉入西九豪宅區，百層高樓令跑友都自覺更渺小，兼失魂，因為鐵路施工之中，行人路日日唔同設計，非常好，可以確保大家腦筋清醒，但跑友最好帶多個指南針。
拐彎路過樓盤的示範單位，嘩，一大班西裝友V哇鬼叫向我們衝來，氣氛媲美渣馬殺入銅鑼灣……「先生，睇唔睇樓呀，抵買喎……」唔係吓話，成身大汗兼背心短褲都似買到樓，多謝恭維！
加快腳步擺脫寃鬼們後，到達中港碼頭，這段比較有趣，因為要左閃右避大叔阿嬸的大小行李，及手上只點不吸的煙仔，這些移動的煙很怪，你會避，愈索得大啖，所以有日，若果有人不幸跑完步患上肺癌，我知點解。
終於捱到遊客眾多的文化中心海旁，正呀有歌聽，這幾天正在上演台灣音樂節，有歌墊底真係跑得快啲㗎，不過遊人太多，惟有借啲意放慢腳步，途中還要幫人揸機影幾張維港合照，無計，好客之道嘛。
去到星光大道，咦，因乜個天好似特別藍，吓，原來新世界中心已經拆咗嗱，一塊紅磚都無留低畀我哋，心有些少「噏」，好在仲有間Starbucks，可以借廁所。
跟住呢段「甘」啦，係上斜過紅館旁邊條空中走廊，其實風景呢處睇最靚，但係以往的貨櫃碼不見了，只見一個小小的港鐵標誌，不禁舉起iPhone影番張相，驚第時唔認得。落斜到黃埔，發達，以往的紅磡碼頭旁邊起了一個新海濱公園呀，不過500米咁短的距離就有兩個公園名，一邊叫尖沙嘴一邊叫紅磡，呢項德政唔知係邊位區議員嘅功勞呢。
接近黃埔住宅區的終點，又見到幾位準備落海浸水的伯伯，唔知係咪合法，但每次都有衝動同佢哋一齊落水玩吓，係唔知搵邊個看管部電話啫……
文：keyman