近年香港甚少真正的鬼片，是促成王晶夥拍葉念琛拍電影《猛鬼愛情故事》的原因。之前因為要遷就內地市場，所有有關妖魔鬼怪的電影都被拍成另類題材，看不慣一些明明講鬼卻沒鬼的另類電影，兩人遂「的起心肝」拍一部以嚇人為己任的正宗港產鬼片，講鬼談情真係有得諗。 撰文：何永寧
現已上映
由於內地電檢制度不容許有神鬼之說，經典的《聊齋》都被拍成既無鬼又無妖的另類故事。葉念琛跟王晶這對先後合作過多部愛情電影的導演，自言看不慣這類不倫不類的所謂鬼片，所以他們自言在萬聖節帶來一部正宗的港式鬼片，一向拍開愛情故事的葉念琛笑說：「未拍過鬼片難得老闆王晶肯出錢畀我試當然當仁不讓，晶哥仲話一人執導一個古仔自然仲好玩。」原來鬼片加愛情故事同功夫加足球這條橋一樣——真係有得諗。
搭有陰影
身旁的王晶表示希望可以拍一部名正言順講鬼的電影，他說：「一直以嚟港式的鬼古都好有份量同代表性，近年香港鬼片就拍到不倫不類。開場明明講鬼到結尾先話係個主角發夢，觀眾邊度睇得過癮。」葉念琛補充說：「真正的鬼片係唔會畀人睇完道氣頂住，有被人老點嘅感覺。心目中有份量嘅記憶係劉鎮偉嘅《猛鬼差館》，搞笑之餘又拍到個氣氛，係一部好成功嘅作品。」他又覺得嚇人的鬼片應該令人有餘韻，不只看的時候有駭人的官能刺激，事後回想亦要有驚嚇的感覺，葉念琛繼續說：「記得李心潔嘅《見鬼》，有一場講佢喺電梯度撞鬼，之後自己搭電梯都有陰影，就係成功嘅例子。」王晶舉出另一例子說：「好似《鬼眼》（TheSixthSense），我就覺得好成功，講到尾原來幫人搵鬼嘅布斯韋利士（BruceWillis）先係鬼，而且合情合理，觀眾係冇得駁咪好嘢囉！」
至於題材他們各自取材，一致認為學校和旅遊都流傳着不少鬼故事，所以各自編了一個以此為元素的鬼故事，葉念琛解釋說：「聽過好多故事都發生喺呢啲地方同場合，好自然就創作出今次《猛鬼愛情故事》入面兩個故事，我哋都有一個共識，就係故事入面一定要有鬼。而且好合適喺萬聖節呢個時間上映，啱晒情侶入場睇。」
校園題材多
對於首次執導鬼片，葉念琛並沒有擔心過不被觀眾接受，他說：「一直以嚟電影都係話題為主，一向嘅創作都係好有葉念琛式嘅概念，今次都唔會例外，一樣會有好多金句同埋好到肉嘅愛情觀。」對於今次再跟愛將鄧麗欣（Stephy）合作，他覺得Stephy經過在內地拍劇的磨練，擺脫了青春偶像的形象，他說：「今次佢雖然屬客串，但佢演嘅女鬼驚艷之餘都好嚇人。」另外加上近幾部電影中合作過的羅仲謙及周秀娜在演繹及配合上可算駕輕就熟。
至於王晶所拍的學校鬼古起用了謝婷婷扮教師及模楊梓瑤Carol則扮鬼學生，他表示希望借用年輕人都熟悉的地方，拍出不一樣的故事，晶哥說：「學校有好多講唔完嘅鬼古，用大家意想不到嘅情節去達到嚇人嘅效果，今次完全唔睇大陸市場，喺創作都更加容易發揮。」
劇情簡介：陰陽路相逢
《猛鬼愛情故事》分成《課室》及《旅行》兩個故事，第一個故事講述老師淑玲（謝婷婷飾）被派往市郊一間中學任代課教師，被編往中四E班授課。班內學生頑劣之外，她還漸漸覺得班中的學生有古怪，女生們經常打扮得十分性感，濃妝艷抹，懷疑她們做援交。偶然間淑玲與教務主任報告學生的問題時，卻發現學校根本沒有中四E班。
娜姐客死異鄉
《旅行》則講述寶（周秀娜飾）在內地旅行時不幸遇上交通意外客死異鄉。跟她一起旅行的四位團友細強（洪天明飾）、雪兒（莊思敏飾）、阿夢（方皓玟飾）和蝦頭（楊詩敏飾）來到靈堂致祭，碰上寶的男友家明（羅仲謙飾）。守夜時間告一段落，蝦頭邀請家明一起晚飯。當大家開懷打邊爐時，家明卻堅持不起筷更嘔吐大作，眾人心裏發毛之際更陸續倒下……
