終於輪到邵美君擔正。數月前看《攣到爆》，赫見場刊預告她首齣獨腳戲《愛是雪》11月公演。不~得~了~，好想尖叫！入行逾十年，四奪香港舞台劇獎最佳女配角，能演能唱，女一號當之無愧，結果粉絲等了又等，依舊只見她演配角、老角、丑角，甚至只得幾句對白，宣傳海報絕少置中，鎂光都像射歪了，得罪人多惹禍？她自首：「我鵪鶉底怕羞底，唔鍾意做主角！」
撰文：蔡俊業
攝影：林栢鈞、楊錦文
劇照提供：風車草劇團及W創作社
邵美君個人簡介
1973年出生。1999年在香港演藝學院修畢高級文憑課程（主修表演）；03年與梁祖堯及湯駿業成立「風車草劇團」，現為藝術總監。先後憑《蛋散與豬扒》、《虎鶴雙形》、《你今日拯救咗地球未呀？》及《影子盒》四奪香港舞台劇獎最佳女配角。
時機
場刊那頁廣告，教我霎時回不過神。
邵美君1999年演藝學院畢業，同年參演春天製作的《年年有今日》，首踏台板；自此，歷年來演出超過30套舞台劇，角色有老有嫩有反串（《你今日拯救咗地球未呀？》飾演爺爺）會歌會跳又懂玩聲，先後四次奪得香港舞台劇獎最佳女配角，一位戰績超班的舞台劇演員，竟然要到出道第12年才自己擔正，對一班台下默默支持的粉絲來說，實在等得太久了。「其實呢，一路都想做solo，但係又唔夠膽出聲，因為覺得自己未儲夠料，未諗到一個好貼切自己嘅topic！」
如今《愛是雪》問世，代表要講的話題已想好了。「係講一個女人去睇感情，睇男人，同埋點樣同男人相處。」她解釋，每個人都要面對和處理兩性之間的問題，愛情如是，家人朋友亦如是。「學校從來無教你，係要你瀨無數咁多次嘢，你先會喺裏面學到！」既然感情缺失經歷比唐某更多，何須等到今天才開口？原來，時間先後是有分別的。六年前的阿君未跟攝影師男朋友阿新結婚，三年前阿君的兒子天睿未出世，尤其是後者，他的出現，令阿君大開眼界，立志要在獨腳戲上開講。「睇住佢一路成長，會睇到好多嘢，譬如同女仔相比，有得玩就可以好滿足，但男仔與生俱來就要學習獨立，而過程又會扭曲到話男兒流血不流淚，其實都幾慘，男仔都有軟弱嘅時候，都需要愛。社會又要男仔負責任，但實情佢哋未必了解個責任係咩，負責又會有咩好處，去到有一刻佢突然間了解到原來負責任咁辛苦嘅時候，就會變，會跩，會出軌，會hurt人！」她反過來，飾演受男人傷害的女主角，劇情主線講她不想介入一段三角關係，決定四處認識別的男人，但每個都令她挫敗，感覺上有點似單拖版的《色慾都市》。
清水
兩年前一個偶然機會，到葵青劇院看《戀愛總是平靜地意外身亡》，這是我首次看邵美君演出。從觀眾席遙望台上，她披着長髮飾演插畫師Michelle，內心泛起兩種感覺。強烈的：那聲線、那語氣、那輪廓都有林建明影子；微弱的：她該是個感情豐富的人，這種人，最能演。往後，越看得多她的演出，貌似大姐明的想法越見淡薄，倒是能演的感覺日漸明確，然而就是沒有看到阿君擔正，相信很多觀眾跟我一樣都會替她不值，她倒是從容的說出內心的奇怪想法。
「我個人性格好怪，好鍾意做戲，但就係鵪鶉底怕羞底，鍾意做siderole，唔鍾意做主角，演主線壓力會好大，咁我揀做戲唔係想有壓力，而係enjoy呢樣嘢，覺得好玩！」但沒壓力，豈有進步？阿君希望借助今次獨撐全場的機會，開拓自己演戲方面的新領域。「我做戲追求一個層面係，做嗰個角色就要似嗰個角色，盡量少啲邵美君，觀眾唔認得我；但好睇嘅solo係要見到演員嘅真我，而個topic亦要貼近呢個演員，套劇先會有血有肉，所以阿祖有《攣到爆》，彭秀慧就有《29+1》，佢哋都有個好屬於佢哋嘅特色。」邵美君呢？她只知做演員如一杯清水，演甚麼角色，放甚麼顏料進水，「小龍（編劇及導演黃智龍）話，我嘅特色係一杯清水做乜都似，佢幫個show諗咗個口號，叫『一人分飾全世界』，哈哈！」
父親
一個人能演，扮甚麼似甚麼，下苦功是必然，然而際遇歷練還看命數，外人只能羨慕，不過聽罷邵美君20年演藝之路，那種跌宕那種痛，叫人難以承受。這夜，阿君帶我離開深水埗港鐵站，穿過北河街，轉入荔枝角道，輾轉來到大南街191號，這裏是她的舊居。
四周都是回憶。「啲舖頭換晒喇，以前對面有間士多，轉角就有間書局，呢兩度都係我哋嘅蒲點，再直行有個公園，呢，『蘭苑』呢間食龜苓膏好出名，以前勁爆暗瘡，阿媽每個月都會帶我食一次，家都仲喺度！」她在家中排行第七，與父母和兄弟姊妹一家十口住在三樓。三樓名為「邵氏國醫診療院」，既是跌打館，也是個暴力家庭，邵老父經常虐打家人，阿君年少時長期活於惶恐中。「打人同鬧人都係毫無先兆，試過因為蒸魚落少咗鹽，俾老竇打到我走落去後樓梯匿埋，等佢冷靜，阿哥接我，我先敢走入屋。」亦試過因為維護八妹，遭他用遮柄不停暴打頭部，令她腫如豬頭，結果報警。上述事例，不勝枚舉。
不愉快的童年，形成自卑性格。「但我覺得好彩，因為我嘅自卑感作祟，好多嘢我都唔夠膽做，當發現做戲咁click到我時，做戲可以戴住面具，我可以無咁驚去表達自己，我好細個就知道要向住呢樣嘢進發。」中三就讀沙田蘇浙公學，認識駐校藝術家潘惠森，是她演戲生涯的一位啟蒙老師，在他的鼓勵下，首次撰寫劇本《輕輕的我怎麼了?!》，以故事比喻九七問題，在外參賽一舉奪得最佳劇本、最佳演員等大獎，「呢件事令我知道我有好多能力，而theatre係可以發生任何事！」中學畢業後入讀演藝，卻因家中兩老爭執，經常請假，留在家中，結果第二年遭校方開除，有如世界末日。「那時我好depressed，甚至覺得自己有精神病，我將自己困喺房內，食罐頭同睇書，每日扮出街返學，當時已搬去同家姐住，然後就話畀佢聽今日學校發生過咩事，但全部都係作，呃晒全世界嘅人，得潘sir同八妹知道，我同所有人講我好憎drama，其實係我面對唔到，所有人都話我係talented嘅，但竟然俾學校開除咗！」三年後，老父過身，她在潘惠森等人的鼓勵，以及大家姐的資助下，重新報讀演藝，1999年畢業，當時她已經27歲。
鳴謝
阿君的經歷精采得可寫一本書，叫《邵美君青春殘酷實錄》，而這篇訪問寫出來的，僅及當中的十分之一。命途多舛，但阿君貴人多。如果將來真有其書，我幻想阿君會寫篇感謝序，一起創立風車草劇團的梁祖堯和湯駿業自不用說，還有誰？我嘗試從對話中找出線索。
兄弟姊妹。「屋企好多兄弟姊妹，爸爸又咁高壓，令我對身邊嘅人敏銳好多，開咗我感性嘅天線，而且開得好闊，對於點樣閱讀人、閱讀自己、閱讀唔同嘅關係同遭遇，都有獨特嘅睇法，呢啲都係作為演員需要嘅。」
潘惠森。「俾學校開除時，佢無因為咁而鬧我，反而不停畀啲機會我去接觸舞台劇。之後我想入番演藝，佢就話：如果你擔心前途，你畢業時新域劇團仲喺度嘅話，我一定請你。」
陳曙曦。「喺戲劇上開闊咗我好大嘅視野，我以前好用力咁做戲，佢不停提醒我，要沉住道氣，唔好演咁多，好準確，演到位，就夠喇！」
媽媽。「由細到大都無逼我去做啲唔想做嘅嘢，佢教我最緊要開心，所以我可以好任性揀呢一行！」
兒子天睿。「責任！一個人時，我可以喪咗咁去做一啲自己想做嘅嘢，就算演戲都係，或者情緒跌宕得可以畀自己去得好盡，但呢個責任提醒我平衡嘅重要，凡事唔可以咁極端，演戲就係講平衡。」
邵美君，謝謝你的好演技和訪問後給我的擁抱。
《愛是雪》
演出日期：11月17日至20日
時間：8pm、3pm（11月19日及20日）
地點：香港藝術中心壽臣劇院
票價：$280、$220
查詢：92672678（W創作社）