開心飛起：787廣島紅夢肥蠔有憶

實不相瞞。昨日各報同新聞都有講，全球第一架波音787Dreamliner航機首航香港，我，就係坐佢返來的第一批夢遊人。官方話要給時間讓機師們更熟習航機再作長程飛行。所以11月1日起航班先飛羽田到岡山及廣島航線，12月先衝出國際飛北京。嘿！狡辯！你班日本人咪諗住呃我！計我話，11月必去廣島，因為……

記者、攝影：陳慧敏
鳴謝：ANA全日空、Hotelsonlines.com.hk

■現在水邊雖只得三兩株山楓變紅，但已經好搶眼！

紅葉！現在有邊個旅記沒有實日本各地個紅葉地圖！天氣暖化關係紅葉期大抵延遲了半至一個月。由廣島約只一小時距離的宮島紅葉谷公園，谷裏都是火紅色的伊呂波楓或山楓。你望見張相好紅係咪？講白你知係借位呃你的！實情現在島上紅葉得幾棵，但小河邊的楓樹已率先變紅，藍天下透着陽光，還是搶入眼球的那種艷紅了。預計11月初或中期那紅會升級，伴着一樣紅得過火的傳統紅橋，及倒映在神寺外、海中央的朱紅鳥居，神之島一樣的神秘景致，令宮島在11月變成旅遊旺地。

■島上小鹿儼如島主，唔驚人，任影。

■因為70年代時ANA727首次國際航班就是飛往香港，所以四十年後的今日劃時代新機出現，第一時間飛香港，仲送乘客787頸巾做紀念。

■嚴島神社是拍結婚相的指定地點之一！

■陽光下，首輪紅葉已經紅得火了。

紅葉谷（紅葉期：11月初起）
交通：宮島碼頭往山坡走約20分
地址：廣島縣廿日市宮島町紅葉谷公園

10、11月可是收穫之秋，廣島特產肥蠔、鰻魚同松茸都係體態最豐腴之時，而冠絕日本全國的廣島蠔，特別係地御前蠔長得更加肥滿甜美！且自從輻射以來，除了香港，連日本好多賣蠔的食店都以「轉用廣島蠔」做招徠，成個島由街邊小攤檔，到商店街旅遊書必載的老字號蠔店統統都在烤，那種香，至今仍在記憶中回味。

■碼頭鄰近更有宮島新名物——和奏。用宮島長的稻米作飯糰，放上蠔或鰻魚，塗上秘製醬料的烤蠔/鰻魚飯糰，約300日圓。

■牡犡屋人氣燒蠔約1,000日圓4個，午市時間排隊預最少等半小時。

■ゆス忠人氣蒲燒鰻魚飯約1,700日圓。

牡犡屋
地址：廣島縣廿日市市宮島町539
電話：（81）8-29442747

ゆス忠
地址：廣島縣廿日市市宮島町中之町濱507-2
電話：（81）8-29440125

和奏
地址：廣島縣廿日市市宮島町北之町濱1183-2
電話：（81）8-29442075

講番這場Dreamliner體驗。這部預計會改變往後航空業飛機設計的飛機，雖然只是中型客機，但省油（省了30%），特別的機翼同穩定系統令航行更加順暢，機內氣壓減到最低，機艙又夠安靜，務求要令大家一路瞓得舒服瞓得好。老實說機上採訪原來好辛苦，你想想百幾人，個個托住攝影攝錄機拖住條咪線，同餐車爭路採訪，簡直係噩夢！如遇氣流啲人實埋唔切位又係點情況？不知是幸還是關架機事，4個鐘機程居然少有地未有發一次「遇氣流，請扣安全帶」通知。我仲唔覺意瞓咗一場，雖然張椅不能躺下太多，但闊了，椅墊又夠厚的關係坐得都幾舒服。

雖然現在只得一部787。但今年年底將增加至9部，12月向國際出發飛北京，1月去歐洲。未有機會坐者，羽田機場內陸航線有個「Museum」有幾張商務客位的機椅給你試瞓。經濟艙座椅採「某航空公司被投訴到九彩」的下滑式座椅，不過這回坐墊弄得夠厚，座位寬度也夠寬，所以坐得比前者的「尼龍床」舒服多了。

1.機艙內氣壓減到最輕，大家各出奇謀做氣壓大測試，除了氣壓計外，姐姐吹定個波上機，到3萬8千呎高空時個波居然仲原封不動無變大喎！

2.兩位老朋友都係飛機癡，逢「新機落地」都必買飛趁熱鬧。787給他們的印象：「機艙好安靜（指無雜音，一機記者邊可能靜？）令機艙廣播他們聽得好清楚。」

3.商務艙座椅不算太豪華，不過機艙空間同樓底都高了，濕度提高，壓力又減低，大家瞓得好舒服。

4.個787忌廉曲奇裏面混有碎果仁。

5.機窗比平時的大了3成，且只要按掣，四十零秒就可令機窗由透明變成最深色，阻擋紫外線！好好玩！唔知會唔會好快俾人玩壞呢？

今年11月，廣島及鄰近5個縣一齊發行了3,000組Mazda歷史限量郵票，將Mazda經典/概念車款一口氣列出，由早期在日本上市的三輪卡車，到2010年上市的全新Mazda5一口氣列出，每張面額80日圓，但係日本人先買得，幾矜貴。

即日起至明年4月20日，乘ANA航空，經日本羽田機場往廣島連兩晚住宿套票，二人同行每位$5,830起。從羽田機場乘國內線往廣島約1小時20分。查詢： http://www.anaskyholiday.com.hk