如果我有80萬，咁就唔使等幾年先可以抽新居屋，夠晒畀首期！但呢80萬若投資喺發燒級音響，可以僅僅夠買一個黑膠唱盤！呢台由德國音響名牌ClearaudioStatement打造，身高1.25米重達350kg、恍如摩天大樓嘅「建築物」，其實只係一部黑膠唱盤。由用料、磁浮科技令音色可達至最平衡、最寧靜嘅效果。不過捨得豪花80萬齋買唱盤，已不只發燒玩家咁簡單，迷戀黑膠嘅情意結肯定亦深不可測。
記者：陳國輝
攝影：陳盛臣
Model：Fion@Zmodel
磁浮列車原理推動
睇完呢個Look，心諗：呢件嘢係咪中環新地標？俾人笑，似乎好正常啫！事關呢部叫Statement的黑膠唱盤，極罕見嘅設計，絕對有「高樓從地起」嘅感覺。佢底部裝上重量達80kg，由頂部延伸落嚟嘅擺鐘，至於最頂部份，就採用有別於一般黑膠唱盤嘅懸浮式設計。玩音響超過20年嘅明哥曾偉明解釋，Statement內置咗磁浮技術，簡單啲講，正如磁浮列車咁，唱盤與支架之間幾乎係零接觸，即使無供電情況下，一樣可浮起，Clearaudio更提供50年保證。
據明哥話，Statement採用懸浮式設計，原因係好多時放置唱盤嘅水平面唔夠一致，結果音色就容易有偏差，甚至出現跳線嘅情況！Statement除咗以擺鐘來修正平衡，唱臂位置更配置水平儀；另外，小記也親身試過按壓正在懸浮嘅唱盤，雖然整個唱盤都在擺動，但唔使一陣，又自然地回到平衡點。
特製亞加力減諧震
整體上，Statement甚少電子裝置，反而偏重物理上扭六壬，務求用最簡單結構，演繹出黑膠最靚聲一面。明哥仲話，Statement除咗突破玩懸浮，其矜貴之處更在於物料。當中最重要嘅半透明唱盤，由特製亞加力膠而成，包含咗礦物以及矽膠物料，優點係比一般亞加力膠更堅硬、密度更高，能有效減低播黑膠時產生嘅諧震，令音色更純正。另外，Statement更採用多種高級材料，如特別堅硬嘅防彈木、全不銹鋼金屬支架以及特厚亞加力膠等。全部物料都為減低諧震而設，同樣以自然音色為最終目標。
ClearaudioStatement
體積：690×1,250×570mm
重量：350kg
特色：懸浮式唱盤、水平裝置、TangentialTT1唱臂、特厚亞加力膠底盤、AMG防彈木及不銹綱支架
售價：$800,000（連StatementTT1唱臂）
明哥推介
入門之選
大嗱嗱花80萬買黑膠唱盤，就算係心頭好，都未必捨得！如果想搵Clearaudio入門貨仔，明哥就推介你揀Concept！佢話呢隻德國牌子曾經憑Concept，踢走英國眾多老牌，奪取當地嘅殿堂級獎項；設計上佢較為Classic，然而此售價包晒唱臂及唱頭，幫你慳番唔少。
Concept（$13,000）
降震層架
如果預算稍為充裕，則可考慮設計較大膽嘅Innovation。底座玩三角形，即時打破傳統上嘅正方形設計，而腳架部份由兩層支架組成，好處係具備一定降震作用，減低跳線或有雜訊等不穩定情況；但留意此售價只包唱盤，唱臂、唱針需要另購，總價肯定要6位數字。
Innovation（$90,000）
雙面洗碟
既然花得幾萬甚至幾十萬聽黑膠，無理由唔添置洗碟機，保養私伙珍藏！其實Clearaudio亦推出咗一部DoubleMatrix，顧名思義，當你滴咗藥水之後，佢就會同時清洗碟面以及碟底，幫你省卻一半時間；外觀設計Classic，十足一件古典家居玩物。
DoubleMatrix（$32,000）
黑膠天碟
《大熱》（約$250）
哥哥成名作品多不勝數，最近新返呢張專輯《大熱》，賣點之一係標榜「180g高品質物料，全日本壓製」，質素不用懷疑；而對於Fans來說，更值得收藏嘅原因，此專輯僅限量發售1,000張，而且有獨立編號。
《LoveAddict》（約$220）
內容包括由劉美君重新演繹的歌曲，例如《你把我灌醉》，除咗可欣賞佢獨特嘅嗓音，更可品嚐由黑膠所演繹嘅人聲特質；另外，此專輯在製作上由Hi-Fi德親自參與母帶處理，可見製作認真及誠意。
《Diamonsandrustinthebullring》（約$220）
喺發燒界眼中，呢張專輯被稱之為「鬥牛場」！點解咁講？據聞，全程製作都喺西班牙鬥牛場內實地進行，可見認真程度爆晒燈！除此之外，呢張專輯更曾經被炒升至一千大元，絕對係發燒友必儲珍藏。
《酒紅色的心》（約$480/雙碟裝）
講到本港嘅經典名作，查實很多都來自玉置浩二嘅《酒紅色的心》！入面收錄咗佢10年間最好聽嘅歌曲，包括港版改編《月半灣》、《酒紅色的心》等，另一特色係呢張輯以孖碟裝設計，加上硬皮紙盒包裝，夠晒精美。
查詢：ErnestAudio（28898876）