美職聯季後賽，估唔到萬眾期待嘅碧咸對亨利會喺西岸4強上演。亨利（左）嘅紐約紅牛周三朝早喺外卡賽，贏咗FC達拉斯2:0，佢自己都入咗1粒，不過，佢哋晉級之後就要對常規賽第1嘅洛杉磯銀河，非常難打。紅牛同銀河係美職聯最多球星嘅球隊，紅牛仲有馬基斯、泰尼奧；而銀河除咗碧咸，亦有當路雲。呢場西岸4強要打兩個回合，首回合會喺周日上演，先由紅牛主場。