對於掛鈎，唔係落螺絲嘅都心存芥蒂！仲記得鐵皮面加雙面膠史上「最流」掛鈎嘛？一星期內必脫鈎。今日來個掛鈎「大飲茶」，估唔到新一代吸盤鈎竟有10kg負載力，更強係一款法國膠，每平方米承重30kg，如果鈎底夠闊，掛起個人都唔難呀！
記者：朱崇德
攝影：陳盛臣、蔡家輝
Model：Rika@GME
TakeAGlance
掛鈎歷史真係無從稽考，不過講到本地發展史，70年代起用得最多必數膠貼式，膠牌或鐵牌一片，背貼厚身雙面膠，易黐不過仲易甩。後期吸盤式、真空式相繼出現，不過講到膠貼式進化，則不可不提以做砂紙起家的美國3M於1996年發明了專利無痕膠條，標榜黐得穩拆除不留痕，為膠貼式掛鈎起革命。
膠水力托30kg
唔知你對膠水觀感係點，法國iDEEFIX打破一般認知！原意用喺唔想鑽牆嘅地方，拎個普通鈎搽膠水黐上牆，就有每平方米30kg負載力，直頭當佢螺絲咁使！實地測試，用嚟黐1吋丁方小掛鈎都有逾10kg掛物能力；再將1呎長層架黏上牆，加塊層板直頭可當書枱使！瓦磚、玻璃、石屎、木材及膠板等光面嘢都用得着，發泡膠、牆紙、油漆面就唔Work。拆除亦好方便，用灰水鏟貼住牆身及膠水接合位落鏟，從角位逐點撬起即可，而且牆身及掛架可絲毫無損循環再用，真係環保。
吸吸鈎小測試
要數掛鈎又點少得普及嘅吸鈎，用於廚房、浴室瓷磚位，乾淨方便，至於邊種最食力，試吓就知！
（以下掛鈎一般家品店有售）
靜電貼式
新愛靜電便捷掛鈎$11.8
囗鴨仔街極有名國產貨！薄如包書膠吸盤薄膜黐上牆，加個扭螺絲抽真空掣，自稱負重5kg，嚟真時掛上10kg啞鈴都頂得住，加上價錢超平，令人驚嘆！
囗安裝時小心指甲劃損薄膜影響吸啜力，螺絲掣亦不宜過份扭緊，否則在抽真空過程中令薄膜出現摺痕就會報廢。
結果：負重10kg+
抽真空式
囗天上野可以話係吸鈎中嘅名牌！鈎背中心軟膠吸盤，外圍膠膜更食力！而且一對掛鈎腳，掛重物後更具穩定性。自稱負重4.5kg，實試10kg頂得住。
囗膠料略嫌唔夠硬淨，掛物超過4.5kg，膠鈎有輕微扭曲，但彈性夠，未見損壞。
結果：負重10kg+
膠貼式
囗3M大型掛鈎係好多人嘅至愛，貪佢黏貼簡單，拆除容易，唔怕會留低膠迹黐花幅牆；自稱頂到約2.2kg，實試去到9.5kg先脫鈎，超額幾倍完成！
囗老實講，缺點冇乜！膠料相當靚，超載情況下鈎身無扭曲，直至飛鈎一刻，鈎身都無「發白」或損毀，靠得住。
結果：負重9.5kg
吸盤式
囗自稱來自日本！鈎位為金屬設計，其他軟腳鈎真係幾值得借鏡！掛鈎好多時唔係因為依附力唔夠而要換，而係鈎位膠料疲勞耗損。掛重嘢，必揀金屬鈎！
囗雖話有5kg負載力，但先後兩次測試，分別在4.5kg及5kg情況下先飄移再脫鈎，價錢仲要係好非一般嘅$30隻，真係幾肉痛！
結果：負重4.5kg
小貼士 得閒裝裝拆拆
清潔牆身再掛鈎，老生常談好多人都知！不過如果話你知，吸盤型鈎類最好得閒拆出嚟再裝過，你又知唔知點解？簡單講！吸盤掛鈎都係以類抽真空方法令佢依附在牆身；點解多個「類」字？因為家居環境好難做到絕對真空！所以水氣、空氣等問題，會在一段時間後影響到掛鈎吸力；所以得閒拆佢落嚟，抹乾牆身再裝一次好重要。
搞鬼款式
a. HOMELESSStoreA（26911981）
b. HOMELESSStoreB（26911980）
c. 文化屋雜貨店（23323145）
d. @HOME（82281118）
e. 惠潤林有限公司（23688382）