自09年掛咗靴之後，打過利物浦、列斯聯等英倫球隊嘅馬迪奧（圖）就冇晒聲氣；不過佢日前接受訪問自爆自己賭癮好大，佢話最初入賭場都好自律，但之後用電話落注就已經開始失控，到咗後來仲以SMS，一注買幾萬鎊；最後賭馬輸咗成100萬鎊（約1,240萬港元）！馬迪奧解釋話賭博好似瘟疫咁，因為足球員有好多時間同錢，所以好易會沉迷落去。