【本報訊】香港大學校長徐立之前晚突宣佈不再續任，再次觸動港大8.18風波這個「政治炸彈」。港大校務委員會主席梁智鴻與徐立之昨一同見記者，同聲否認徐不續約與8.18風波或政府壓力有關。但據了解，徐立之是因8.18而不續約。立法會議員普遍認為徐離任謎團未解，須傳召徐立之和梁智鴻等到立法會交代。記者：莫劍弦、倪清江、歐陽子瑩、彭美芳
徐立之與梁智鴻昨午雙雙現身見傳媒，試圖為徐不續約被指因政治壓力而解畫「消毒」，但兩人說法牽強。徐立之拋出「更新論」，指做了校長十年，「十年係非常長嘅時間，健康嘅機構要有更新」。又舉例，「生命好似一條管，要有入有出，否則會冇咗生命」。強調大學要更新才可持續發展，「呢個係我唔續約唯一原因」。
「唔係8.18一定唔會走」
記者追問他為何今年初曾表態有意續任，現忽然「轉軚」，徐推說：「當係時開始傾，但未有決定。」至於是否8.18事件令他意興闌珊，或備受政治壓力，他統統否認，「大家覺得好突然，其實已經傾咗好耐，邊個時候先適合（公佈）見仁見智喇」。
梁智鴻發言時，先滔滔不絕說了近五分鐘，解釋校務委員會接受徐立之的決定及招聘新校長如何艱難，站在一旁的徐立之不時點頭苦笑，之後又解釋與徐在處理李克強事件等問題上無分歧，「有記者問我同校長係咪有分歧，我睇唔到有分歧」。又稱兩人最近仍相約吃早餐，強調與徐立之在8.18事件的看法一致，「香港大學冇做錯，校長都冇」。
梁、徐二人聲聲否認徐立之離開與8.18事件有關，但有港大中人指徐希望再續約是公開秘密，港大內部一直未有準備招聘新校長，「唔係發生8.18事件，徐立之一定唔會走」。另一政界人士也指，8.18事件後，政府不滿徐立之企圖置身事外，「唔少高官對徐立之卸膊好不滿，當時已經有官話佢咁樣搞，好難再做（港大校長）落去」。而徐將港大邀請副總理李克強出席百周年校慶典禮，說成是李「送上門」，「咁樣講係激嬲中央，因為根本唔係事實，雖然港大立即出稿澄清，但已經補唔到鑊」。
該政界人士相信，梁智鴻身為行政會議成員，「北京、特區政府有幾唔滿意（徐立之），點會唔知！」梁也毋須「畫公仔畫出腸」叫徐立之走，「唔再同你（徐立之）傾續約、係咁畀說話你聽，以徐立之學者性格，自己都知唔可以再留低！」
「點解未有結論就要走」
立法會教育界議員張文光指出，徐立之與梁智鴻會見傳媒後，仍無法釋除公眾疑慮，「點解（8.18事件）調查進行緊，仲未有結論就要走，好離奇，同過去講法好大分歧，公眾會聯想同8.18相關」。他擔心徐因政治壓力離開，「希望徐立之可以嚟立法會交代」，梁智鴻及教育局局長孫明揚也有責任交代。
身兼港大校董會成員的職工盟李卓人同樣質疑，徐不續約與8.18事件有關，認為立法會應傳召徐立之及港大管理層交代。另一議員何秀蘭更稱，就算徐立之離開港大，不代表立會不追究，「唔好以為走咗就可以唔使嚟立法會交代」。
同是港大校董的民建聯葉國謙相信，徐立之的決定跟8.18事件有間接關係，但他對傳召徐立到立會解畫有保留，擔心大學事務政治化。
8.18風波...
