毋須遠赴海洋公園同迪士尼，先可以感受哈囉喂氣氛，就算近如旺角，一樣俾你過足鬼癮！好似朗豪坊咁，就搞咗個AR（擴真實景）見鬼大法，只要舉起智能手機，就可近距離與鬼合照，將其魂魄「Phone印」喺手機內，好過癮㗎！
記者：陳國輝
攝影：伍慶泉
3D攝青鬼隱藏相架
所謂AR擴真實景，即係透過手機鏡頭拍攝密碼圖案之後，iPhone或者iPad2屏幕上就會出現唔同類型嘅鬼怪，若然你唔知AR係乜，真係會以為自己忽然撞邪㗎！
當你入到朗豪坊4樓「黑色馬戲班」專區，就會見到除咗疑真疑假嘅墓碑、古樹等詭異佈景外，仲有一間神秘照相館，入到去，你只要單撈咗《黑色朗豪坊》App並啟動照相功能，就會發現其中一幅相架內，竟匿藏一隻3D攝青鬼！最過癮係，你仲可以走埋佢身邊，同鬼來個合照，至於佢匿埋喺邊一幅相？呢樣就留俾大家去現場搵喇！
見密碼 四方遊魂現真身
離開咗「黑色馬戲班」，其實商場每處仲匿埋咗好多遊魂野鬼！好似骷髏喪屍、無頭女鬼、吸血殭屍等，只要你夠膽四圍走、四圍搵，發現商場內有密碼圖案，就可以舉高手上嘅iPhone或iPad2鏡頭逼佢現身，齊齊影合照，有恒心嘅大可當閃卡咁集齊一套！
影完鬼相，返到「黑色馬戲班」內仲有其他哈囉喂節目，例如你可透過石柱上嘅鏡頭，自拍一幅大頭照，跟住你就會變成鬼故事嘅主角；另外，你仲可經iPhone單撈《Disney'sSpookyFun》，將手機變成遙控器，然後同馬戲班內5隻鬼玩「猜情尋」。
猛Apps推介
打鬼必玩
以前喺機舖都玩唔少SEGA出品嘅喪屍射擊遊戲，不過畫面勁轉，睇得多有啲暈；玩番iPhone小遊戲反而較為舒服，點玩法都唔使講，值得注意係爆炸場面幾多，應可滿足你嘅廝殺慾！
兒童適宜
如果俾小朋友玩，最好避免單撈太血腥或太恐怖嘅Apps！呢款《萬聖節形狀拼圖》擺明屬於3歲細路哥遊戲，而且哈囉喂人物睇落仲鬼死咁可愛，老少咸宜。
探險必備
你同我又唔係司徒法正，就算入到鬼屋探險，都未必Feel到有嘢啦！但據講呢個測鬼儀器真係有料到，佢能夠偵測磁牆活動，若你聽到咇咇聲或見到電磁波活動，唔好嚇自己住，可能係電器在釋放能量啫。
動感桌面
唔係每個Apps都咁嚇破膽，好似呢款動態桌面，設計得好靚，完全唔恐怖！提供好多款Theme俾你揀，最特別係你一邊用手指掃，跟住就有火花跌落嚟，極度凄美浪漫，女仔實鍾意！
靈異拍攝
玩厭咗一般魚眼、模型等拍攝效果？單撈《SpookyPic》，可能有不同體會。呢款影相Apps提供咗20種色調以及16種特殊效果，推薦手掌、指紋Effect，仲要將照片Tune到陰陰沉沉，自製靈異照。
