拍拖三年多的女友要與健偉分手，健偉說分手原因不便公開，但其實甚麼原因都是一樣，「她不再愛你」。健偉急召幾位「好兄弟」帶佢出去癲番晚！兄弟們兩脇插刀，立即計劃行動，男人要癲都不離酒精+女人，對一名剛失戀，自信盡失的男人來講，要找到這個組合，最實際都係去一個場，呢個場叫「歡場」。
健偉的朋友們身經百戰，臨入場已經傾好行動策略，首要控制好budget，因為剛失戀的人一飲酒就好癲，會掟東西，所以佢面前不能有例如，遙控、生果盤、煙灰缸等硬物，而一定要飲烈酒，快醉快了事，慢醉變數大；另外切記今晚唔係自己去玩，要時刻陪佢玩，陪佢傾偈，陪住佢喊，將佢發癲可能減至最低，但如果佢都發癲，幾位兄弟已經分工清楚，每人負責壓着他身體其中一部份，要他動彈不得，然後疏散所有女的，再同佢慢慢講數。到「歡場」後各兄弟找了一個熱情主動、身材惹火的年輕靚女服侍健偉，一切進展良好，行動將順利完成之際，健偉酒醉突然感觸，竟哭訴女友跟他分手的原因，「佢話我唔同佢做愛，所以要分手！」各兄弟面面相覷，為免家醜外傳，連忙示意那位惹火美女「加班工作」，美女收到指示後，立刻騎着健偉，意態撩人地說「等我同你開心吓啦！」美女擁吻健偉，健偉像頭野獸一樣，想就地把美女正法！但他突然全身抽搐，反白眼後暈倒去，一眾兄弟慌忙報警求助。原來健偉每每性興奮，就會發羊吊，但一直因自尊不肯求醫，女友因此要提出分手。
原來導致對方不愛你，可能是因為你無謂的「自尊」。
作者Profile
編劇、導演兼電台節目主持，認為「愛情」是沒有工作時的玩意，「工作」是沒有愛情時的必需。
作者：鄒凱光
逢星期三刊出