潮人黃偉文（Wyman）下年二月會喺紅館搞首次演唱會，海報今日率先曝光，概念係Wyman玩一王四后，搵嚟幾大唱片公司一姐同佢合作，包括東亞嘅鄭秀文、何韻詩、環球嘅陳慧琳同英皇嘅容祖兒。
祖兒Sammi搶「鏡」
講到今次演唱會，Wyman話：「自從電視台發生咗四大事件，幾大陣營都好少上電視，咁就出現喺我嘅紅館舞台啦！」Wyman話根據相熟程度，由最唔熟嘅Kelly開始打電話邀約影海報，四位歌手都一口應承，令佢相當感動：「首先要肯影，之後要肯嚟，之後要度期，佢哋連着乜衫都冇問就應承，真係受寵若驚，係連佢哋經理人、公司都OK，呢個世界真係好多好人。」
Wyman準備咗總值500萬嘅靚衫畀幾位天后，最終佢哋任由安排，近乎真空嘅祖兒着喱士Chanel裙，有肉色泳衣打底；阿詩就以Gucci上陣，露出對美腿，Sammi同Kelly就着YSL；Wyman就以Lanvin西裝配W＆LT巨型頸鏈。Wyman又爆Sammi同祖兒影相時爭搶「鏡」：「面前得一塊鏡，但唔夠四個人照，阿詩一早唔理，祖兒同Sammi就成日叫住照呢邊多啲，照嗰邊多啲，搶嚟搶去，名副其實係搶一塊鏡！」